مرت سنه والقلب به جرح ماطاب
فرقا الحبيب اللي خذتـه الليالـي
فجأه حبيب القلب عن ناظري غاب
وارسل يقول انه تركنـي لحالـي
يغيب عن عيني ويرحل بلا أسباب
بالله قولـوا واحكمـوا بالعـدالـي
وش حيلة اللي داخل القلب منصاب
مجروح ينـزف حالتـه باعتلالـي
حسبي عليه الراس من سبّته شاب
وهـو بعيـد ولا بحالـي يبـالـي
مايدري إن الشوق بالقلـب شبّـاب
امسي وانا ضلعان صدري تصالي
أمسي وأنا مثل الذي قارصـه داب
والا طعين وجرح صـدره سيالـي
لافاد بي تجبير كسري ولا اطبـاب
عينـي غريقـه دمعهـا بإنهمالـي
اشوف طيفه صوب عيني ولاغاب
واسمع صدى صوته يداعب خيالي
واحس ضلعاني بها طبـل حـرّاب
يدقـهـا دق العـصـا للطبـالـي
حبيبي اللي نور خده كمـا شهـاب
بالروح أنا أغليه عن كـل غالـي
أشتاق له بالحيل والشـوق غـلاّب
وش حيلتي غير القصايـد تلالـي
مرت سنه والقلب به نار وشهـاب
يحرق حشـاي ولا تهيّـا دوا لـي